O gran poema grego da Odisea, onde Homero describe a peripecia do heroe Ulises ata regresar á súa patria, Ítaca, é o fío condutor desta recreación poética de Rafael Catoira Rey.
En Navegando cara a Ítaca, a vida —e a poesía— móstranse como a viaxe imprevisible que efectivamente son.
A obra principia cun “Ítaca non existe” para proseguir logo con esta declaración de intencións: “Viaxo ó teu encontro. /Non chegar nunca,/ gozar só do presaxio” (...).
Polos versos de Rafael Catoira van transitando algúns dos personaxes do poema homérico: Ulises, a súa muller Penélope, o seu fillo Telémaco, o xigante Polifemo... Aos que fai falar e reflexionar, e aos que a voz poética tamén interpela.
Esta obra recibiu en 2013 o segundo premio na edición número 39 do Certame Literario do Concello de Vilalba (Lugo), un dos concursos poéticos máis veteranos de Galicia.
Rafael Catoira Rey naceu na aldea de Laxe, no municipio de Culleredo (A Coruña). Dedícase á actividade empresarial no sector da construción. «A crise económica reduciu a miña empresa e deume o tempo necesario para dedicarme ao que sempre desexei e deixara de man: escribir», confesa. Este é o seu primeiro libro de poemas.
