Un ensaio máis un libro de arte nun só volume. A biografía do pintor e escultor lugués Miguel Anxo Macía inclúe a reprodución de 200 obras do artista.
Biografía ilustrada do pintor e escultor Miguel Anxo Macía (Lugo, 1955) elaborada polo profesor Camilo Gómez Torres. Pertencente á coñecida como “Xeración do 75” Macía, un artista na plenitude do seu proceso creativo, é un dos pintores galegos máis destacados. “A obra de Miguel Anxo Macía —sinala o autor— sorprende pola súa perfección técnica, a mestría do seu debuxo, a exuberancia sensual da súa inesgotábel paleta cromática, a identificación coa terra na que naceu, e a tensión emotiva das súas composicións pictóricas”. Este ensaio inclúe unha galería gráfica onde se reproducen máis de 200 obras (cadros e esculturas) do artista, dende os seus primeiros traballos a comezos dos anos 70, ata a actualidade.
Camilo Gómez Torres (Quiroga-Lugo, 1948) é doutor en Filoloxía Románica Hispánica (Galego-Portugués). Foi mestre na Escola de Maxisterio de Ourense e, dende 1977, profesor de Literatura no Instituto Lucus Augusti de Lugo, ata a súa xubilación en 2009. Especialista na obra poética de Manuel María, é autor de Manuel María: os traballos e dos días (2001), Orientacións para o uso dos signos de puntuación (2002), Bibliografía de Manuel María (2003), A Terra Chá na poesía de Manuel María. Rotas culturais para unhas viaxes poéticas (2003), e O tempo vital de Manuel María. Crónica sociolingüística (2005). Coordina, ademais, a publicación da revista Xistral de creación poética lucense.
.jpg)
