En 2016 rescatamos doce fotografías panorámicas moi descoñecidas desta cidade, A CORUÑA ANOS 20, que foran editadas por Luciano Roisin  (París, 1884-Barcelona, 1943), como postais de gran formato, naquela década do século pasado.

Agora, no verán do 2018, descubrimos oito novas imaxes daqueles días, que permanecían gardadas no Institut d’Estudis Fotogràfics de Catalunya, onde se custodia a magnífica Colección Roisin.

Estas oito panorámicas, que bautizamos como A Coruña Anos 20 (II) completan aquela primeira entrega  e decidimos editalas tamén en formato de postais panorámicas (12 x 29 cms).

Descubrimos de novo unha Coruña enormemente atractiva e moi diferente, por outra banda, aos ollos de hoxe: os baños en Riazor, a actividade no Porto, un Parrote ben distinto, os emblemáticos hoteis Atlantic ou Palace, ou o novo rañaceos do Banco Pastor sobresaíndo no sky-line, entre outras instantáneas. Todas elas nos levan de viaxe a unha década onde emerxería o turismo... 

Luciano Roisin sempre buscaba perspectivas extraordinarias das cidades, moi visuales e de gran profundidade. Esta sinxela mostra será, pois, unha delicia para veciños e visitantes.
 

PDF [Ficha + nota de prensa]