ROSA TÁNTRICA

Un diálogo con Borges en novos e orixinais poemas

Luz Pozo Garza

Luz Pozo Garza regresa á poesía en galego cuns versos retadores. Levan por título Rosa tántrica e publícase no verán de 2016 na Colección Libros do Sarela de Alvarellos Editora. Asistimos a un microcosmos poético moi singular. Afastada de calquera moda ou tendencia, a escritora e filóloga —nada en Ribadeo en 1922 e autora do seu primeiro libro de poemas hai case setenta anos (Ánfora, 1949)— establece aquí un diálogo con Jorge Luis Borges a partir do relato “La rosa de Paracelso”, onde o escritor arxentino narra a historia do mago alquimista e do seu incrédulo discípulo. Neste conto, Borges afonda na orixe da creación como algo transcendente. Sobre estes vimbios constrúe Luz, ceibe, a súa Rosa tántrica.

DEZ ANOS DE TRABALLO EN 63 POEMAS

É o seu regreso, despois de Deter o día cunha flor (2009), á poesía en galego. Un conxunto de versos nos que a creadora levaba traballando preto dunha década. O libro consta de 63 poemas, estruturados en dúas partes ou “Libros” e trece capítulos.

Luz Pozo mergúllanos nun peculiar universo poético no que, por veces, a puntuación xoga cos lectores e a lingua galega atrae como imán termos e xiros do sánscrito, latín, inglés, portugués e castelán.

SIMBOLOXÍA BUDISTA

Aquí, a simboloxía budista e o tantra agroman en cada intre: a enerxía positiva de Pundarika, o vieiro cara ao alén da Tábula Esmeralda, o ciclo de vidamorte-vida-reencarnación do Samsara, a pureza da Flor de Loto... Mais tamén os enigmáticos tigres de Borges ou a aparición de filósofos como Carl Jung “aquel sabio que entendía a alma”.

A IDEA DE ETERNIDADE A TRAVÉS DA CREACIÓN

Pídenos Luz, dende o seu outeiro vital, que, coma ela, nos enfrontemos á idea de eternidade a través da palabra e da creación. Así de rica e complexa é esta misteriosa e transcendente Rosa tántrica.

Esta edición, ao coidado de Olivia Rodríguez e Henrique Alvarellos, conta coa colaboración dos escritores Carmen Blanco e Claudio Rodríguez Fer, que asinan senllos poemas ao final da obra. Así mesmo, Luz Pozo é a responsable da ilustración da capa e dos debuxos interiores.

Ver interior

PDF [Ficha + nota de prensa]

O autor/a

Luz Pozo Garza (Ribadeo,1922) é poeta, ensaísta, crítica literaria, foi catedrática de Ensino Medio e pertence á Real Academia Galega desde 1996. A súa obra poética principia con Ánfora (1949). En galego, con O paxaro na boca (1952), á que seguiron, entre outros títulos, Verbas derradeiras (1975), Concerto de outono (1981), Códice Calixtino (1986), Vida secreta de Rosalía (1996), Deter o día cunha flor (2009)… Como ensaísta e crítica, publicou traballos arredor de Luís Pimentel (A bordo dun barco sen luces —Alvarellos Editora, 2011—), Álvaro Cunqueiro ou Luís Seoane. En 2014, os profesores Aurora López e Andrés Pociña publicaron Á procura da poesía. Vida e obra de Luz Pozo Garza (Alvarellos Editora), un volume de máis de 500 páxinas onde definen á escritora como “quizais a meirande figura das Letras galegas dos nosos días”.