Quique Alvarellos, director de Alvarellos Editora

GALEGO | ESPAÑOL | ENGLISH

CESTA(0)

Galego | Español | English

Cesta (0)

Factoría de contidos desde 1977

Quique Alvarellos

Henrique Alvarellos Casas (Lugo, 1968) é licenciado en Filoloxía Hispánica pola Universidade de Santiago (1991) e Máster en Medios de Comunicación pola Universidade da Coruña/La Voz de Galicia (1994). Xornalista, escritor, editor e xestor cultural, é autor de varios libros, entre os que destacan Territorio auroral. 36 memorias vivas de Compostela (1997), Teoría de Lugo (2004), Galicia en cen prodixios (2004), Diario dun pai acabado de nacer (2008), Santiago, 1909 (2009), Balada ceibe no bosque de Conxo (2018), o álbum ilustrado por Xulia Nieto A nena que abrazaba as árbores (2020) e Federico García Lorca en Santiago de Compostela (2020).

Desde 2004 dirixe Alvarellos Editora, a empresa cultural que fundara seu pai en Lugo en 1977 e que hoxe é a vicedecana das editoras galegas. Define a súa empresa (que desde 2009 ten a súa sede en Santiago de Compostela, na rúa de Sempre en Galiza), como 'factoría de contidos culturais', unha editora que recibiu nos últimos anos, entre outras distincións, o Premio Manuel Beiras (2016) pola súa defensa da lingua galega, o Irmandade do Libro (en dúas ocasións 2008 e 2014) outorgado pola Federación de Librarías de Galicia, ou Premio á Edición histórica (2007) da Asociación Galega de Editoras. Ademais, varias das publicacións de Alvarellos Editora recibiron o recoñecemento dos Premios da Edición de Galicia ou foron finalistas en diferentes categorías da Gala do Libro Galego.

Henrique Alvarellos é tamén autor de centos de artigos e crónicas na prensa galega dende finais dos anos oitenta e impulsor de iniciativas culturais como a conmemoración do centenario da Exposición Rexional Galega de 1909 (mediante unha gran exposición fotográfica comisariada e montada por el, en 2009), a apertura do Bosque do Banquete de Conxo (2018) ou a posta en marcha do 25 de outubro como Día de García Lorca en Galicia, onde participaron, na primeira edición, celebrada en 2018, centos de escolares, institucións e particulares, de toda Galicia.
Desde maio de 2017 é vicepresidente, por catro anos, (con Xosé Ballesteros na presidencia) da Asociación Galega de Editoras, o colectivo que agrupa o 90% da produción editorial de Galicia.

[Datos actualizados a outubro de 2020].

É autor das obras seguintes:

	Federico García Lorca en Santiago de Compostela (Alvarellos Editora, 2020). Un paseo único co poeta pola súa amada Compostela. Inclúe máis de setenta ilustracións e documentación moi descoñecida. E traza a primeira ruta lorquiana por esta cidade.
	A nena que abrazaba as árbores (Verdemar 2020). Un álbum para primeiras lecturas. Ilustrado por Xulia Nieto. Abraza unha árbore e descobre a natureza que tes moi preto da casa.
	Balada ceibe no bosque de Conxo (Concello de Santiago, 2018). A historia dun espazo único, ao sur de Compostela, onde se celebrou o Banquete de Conxo de 1856. Edición non venal que inclúe os tres brindes pronunciados naquel acto.
	Os últimos carballos do Banquete de Conxo (Consorcio de Santiago-Alvarellos Editora) , coautor xunto con Xurxo Martínez, Francisco Singul e Martín Souto. Obra finalista na Gala do Libro Galego 2017.
	Santiago, 1909 (Consorcio de Santiago/Alvarellos Editora, 2009). A crónica da Exposición Rexional Galega de 1909 que recupera máis de setenta fotografías e ilustracións daquel histórico evento.
	Diario dun pai acabado de nacer (Xerais, 2008). Crónica íntima sobre a experiencia da paternidade. Escrito como diario ao longo de case cinco anos e pensado como un longo poema en prosa.
	Descubrir Lugo (Edicións do Cumio, 2006). Unha proposta de fin de semana na Cidade das Murallas. Editada en tres idiomas (galego, español e inglés), céntrase nos cinco grandes tesouros lugueses: arqueoloxía, monumentos, natureza, gastronomía e cultura.
	Teoría de Lugo (A Nosa Terra, 2004), crónica intimista e sentimental, 23 relatos a través dos que ir descubrindo algúns dos espazos máis emblemáticos do municipio.
	Galicia en cen prodixios (Edicións Xerais, 2004). Guía 'secreta' de Galicia, con cen singulariedades e autoorgullos que fan deste país unha terra única.
	Territorio auroral (Consorcio de Santiago, 1997), unha historia da cidade de Santiago de Compostela durante o século XX narrada a través de 36 persoeiros que viviron os acontecementos máis importantes.