Alvarellos Editora foi fundada en Lugo en maio de 1977 por Enrique Alvarellos Iglesias (profesor, músico e escritor. A Coruña 1931-Lugo 2004), pai do actual director. É unha das empresas de edición máis veteranas de Galicia.
Durante os seus primeiros anos de vida (período 1977-1984) contribuíu activamente a impulsar o rexurdimento cultural que vivía o país tralo retorno das liberdades.
Neste contexto viron a luz preto de cen títulos de todos os xéneros (narrativa, poesía, teatro, historia, ensaio…) con obra de escritores contemporáneos como Manuel María, Xavier Alcalá, Moreiras Santiso, Xosé Dono ou Xavier Rodríguez Barrio.
Nos anos 90 especializouse na edición facsimilar de grandes clásicos da cultura galega: Cura de Fruíme, Pai Sarmiento,Tettamancy, Samuel Eiján…
A finais de 2004 principia unha nova etapa da man do xornalista e escritor Henrique Alvarellos Casas (Lugo, 1968).
A editorial abre a súa sede en Santiago de Compostela, pon en marcha coleccións como a denominada Rescate (recoñecida como Mellor Obra Editorial de 2008 en Galicia), a de gastronomía “A lume lento” (dúas veces premio Gourmand en 2006 e Premio Álvaro Cunqueiro en 2008) ou a de divulgación e ensaio (Oeste), ao tempo que potencia a distribución e presencia por todo o territorio español, con títulos como “Patrimonio natural. Ciudades Patrimonio de la Humanidad de España” cuxa primeira edición alcanza os 11.000 exemplares.
Na actualidade, o catálogo vivo de obras achégase aos cen títulos ao tempo que a empresa inicia o salto ao mundo dixital e á xestión cultural por medio da montaxe de exposicións (a primeira delas foi “Santiago, 1909”, en setembro de 2009), entre outras actividades de promoción cultural.
|
|
ver cesta
