Alvarellos Editora

ver cesta

Enviamos o seu pedido sen custes adicionais. Directamente ao seu domicilio. SEN GASTOS DE ENVÍO

O EDITOR/DIRECTOR

Henrique Alvarellos Casas

Henrique Alvarellos Casas (Lugo, 1968) é xornalista e escritor, e dende xuño de 2004 —data de falecemento de seu pai, Enrique Alvarellos Iglesias— dirixe Alvarellos Editora.

Licenciouse en Filoloxía Hispánica en Santiago de Compostela en 1991 e obtivo o título de Posgrao en Comunicación pola Universidade da Coruña en 1994.

Como xornalista, Quique Alvarellos iniciou a súa andaina no diario El Progreso de Lugo e traballou logo como redactor na Televisión de Galicia, en La Voz de Galicia, foi correspondente para Galicia da revista Cambio 16 e redactor xefe do Atlántico Diario de Vigo. Foi así mesmo xefe de prensa da Consellería de Obras Públicas e asesor de Comunicación de Turgalicia e do Xacobeo.

Quique Alvarellos combina o seu traballo na dirección de Alvarellos Editora coa colaboración como columnista para varios xornais do país, a súa condición de escritor, e exerce tamén como asesor de comunicación.

Presentación de Descubrir Lugo (Lugo, 05/05/2006)

Presentación de Galicia en cen prodixios (Sanxenxo, 06/08/2005)

É autor das obras seguintes:

	Santiago, 1909 (Consorcio de Santiago/Alvarellos Editora, 2009). A crónica da Exposición Rexional Galega de 1909 que recupera máis de setenta fotografías e ilustracións daquel histórico evento.
	Diario dun pai acabado de nacer (Xerais, 2008). Crónica íntima sobre a experiencia da paternidade. Escrito como diario ao longo de case cinco anos e pensado como un longo poema en prosa.
	Descubrir Lugo (Edicións do Cumio, 2006). Unha proposta de fin de semana na Cidade das Murallas. Editada en tres idiomas (galego, español e inglés), céntrase nos cinco grandes tesouros lugueses: arqueoloxía, monumentos, natureza, gastronomía e cultura.
	Teoría de Lugo (A Nosa Terra, 2004), crónica intimista e sentimental, 23 relatos a través dos que ir descubrindo algúns dos espazos máis emblemáticos do municipio.
	Galicia en cen prodixios (Edicións Xerais, 2004). Guía 'secreta' de Galicia, con cen singulariedades e autoorgullos que fan deste país unha terra única.
	Territorio auroral (Consorcio de Santiago, 1997), unha historia da cidade de Santiago de Compostela durante o século XX narrada a través de 36 persoeiros que viviron os acontecementos máis importantes.